السلام عليكم ورحمه الله و بركاته
أدري والله مشتاقين لي و أنا مشتاقة لكم أكثر .....
بأذن الله راح يكون تدوينة بكل يوم السبت (انشاالله الله يثبتني على هذا القرار ) وأذا تبون أتكلم لكم عن أي شي بس عطوني خبر و أنا حاضره لكم ....
و نقول بسم الله
السنة هذي أكثر سنه أشتريت فنديشن ( كريم أساس) لحد يسألني ليه ! كل ماسفرت أو رحت مكان أشتريت ههه.
أول واحد لانكم ( LANCOME Tent Visionnaire) :
جدا جدا بايخ ، دهني ما يناسب البشرة الدهنية أبد ( ثقيل و دهني ) و ألوانه بايخة المهم ما عجبني أبد .
زعلانة من حقت المحل لعبت علي -ــ- لا اللون لوني ولا النوعية نوعية بشرتي !
بس زي ما انتوا شايفين مستخدمته !!
بعلمكم طريقة حلوه عشان تستغلون الفنديشن الغلط :
أذا كان دهني و ما ناسبك أخلطيه مع فنديشن يصير قوامه خفيف و ما فيه زيوت أبد .
أذا كان لونه غلط مثلا هذا لونه غامق أخليطه مع واحد لونه فاتح بزيادة على لون بشرتك ( هذي الحركة مره فادتني يوم كان لوني تان كنت أستخدم الحركة كثير )
هذا كونسيلر برضو من ( LANCOME ) :
(فكرته جميلة يصير مكانه بغطاء الفونديشن طبعا مو شرط يجي مع الفنديشن بس اذا حابه يصيرون سوا تقدرين تقولين لهم )
لونه جدا ما ناسبني كا كونسيلر *قايلة لكم حقت المحل لاعبة علي -ــ-*
خلوني أقول لكم الحركة الفنانة الي استغليته فيه :
قبل فترة حطرت لأيفنت لـ بيبي براون و سألت المايك اب ارتست عن هالاتي كيف تروح ؟
( أنا ولله الحمد ما عندي هالات بس بالفترة الأخيرة نظام نومي حوسة و قاعدة اطلع و أسافر كثير و نظام أكلي حكاية ثانية فأكثر شي يبان فيه التعب عندي هو عيوني فصاير لون الهالات أزرق مخضر :""( يوم رحت للدكتور قال هذا من التعب و الأرهاق )
نرجع لكلام المايك اب ارتست قالت بما ان لونها أرق تكسرين اللون و تحطين لو دافي (مشمي - برونز ) درجة تصير أغمق من بشرتي و بعدها تحطين لون الكونسيلر العادي (الي نفس لون بشرتي ) بعدهم كلهم بودرة شفافة وبس ...
من الفن الي فيني تذكرت أن عندي كونسيلر لونه برونز و طبقت الطريقة وضبطت الحمدالله !
قوامه كا كنسيلر حلو ثقيل شوي و ما يخطط !
الثاني هو ( MAC Studio Fix Fluid SPF 15 ) :
هذا الحب الجديد معروف أنه حلو !
قوامه وسط و ثباته جدا عالي و تغطيته حلوه و يناسب أغلب البشرات ...
ثالث واحد اشتريه كنت أستخدمه بالصباح بدون كونسيلر و الليل بكونسيلر تغطيته جدا جدا طبيعية تحسين أن البشرة تتشربه و ألوانه كثير و جميلة ! يثبت معه البلاش و الكنتور أعطيه ١٠ من ١٠ براحه .
للحين ما شفت بيرفكت أكثر منه و مره يناسب أجوائنا بالرياض !
( بشرتي أنا لا دهنية ولا جافة مختلطة فا مره مناسبني )
الثالث هو ( BOBBI BROWN Long-Wear Even Finish ) :
سمعت عنه كثير و تحمست له مره بس يوم جربيته طلع عادي جدا .
قوامه وسط لخفيف ثباته وسط (أنا أحط شوي مو كثير ) و تغطيته جدا عادية ...
يناسب البشرة الصافية لان تغطيته بسيطة إلا اذا ناوية تحطين كثير كونسيلر و يصلح للصباح لان خفيف و فيه نسبة واقي شمس وبس ! فيه ميزة ميزته أن صدق يخلي البشرة طبيعية و البشرة تتشربه بقوه ...
الرابع هو ( YSL PERFECT TOUCH Foundation ) :
تدرون هذا سابع واحد اشتريه لدرجه شوفي اللوقو مغيرينه باللكولكشن الجديد
اول شيء فكرته حلوه يعني تضغطينه ويطلع و له اون واوف
ما تتصورون قد ايش فرشته جميلة كذا خفيفه مره مع الفونيشن توزع بسرعة انا اللحين مستغنيه عن كل فرش الفونديشن بسببها *انا بعطيها براءة إختراع
ثاني شي مره حلو الونه اساسا شويه الوانه بس حلوه شوفوا لون الي بصورة طالع على تان وانا بيضة ومره مناسبني
التغطية حلوه يعني لو عندك حبوب يبغالك كونسينر قبل
فيه حماية من الشمس مره حلو للدوام، خفيف مره على البشرة! و في شي مره احبه فيه ان البشرة صدق تتشربه يعني ما تحسين انك حاطة شي ابدا.
يناسب البشرة المختلطة مرره وحتى الدهنية يعطيك لوك المات يعني ما فيه زيوت ابدا.
انا استغرب كثير ناس ما يعرفونه مع انه مرره حلو يناسب كثير.
الخامس هو ( CHANEL Perfection Lumiere ):
مره أحبه الوصف الأمثل له هو المويه مررره خفيف على لبشرة و تمتصه البشرة بشكل لطيف و ما يكتم البشرة نهائي حلو لكل وقت و كل مكان !
كنت أستخدمه بجده عشان الرطوبة و هو و MAC الوحيدين الثابتين و ما خل وجهي يقلب دهني مره مناسب للسفر تغطيته ثقيلة نوعا ما بس حلو !
يناسب أغلب البشرات و ألوانه كثير ... أحبه
السادس هو ( The Body Shop All-In-One BBcream ) :
أسوء بي بي كريم استخدمته مرره بايخ مافيه لون ولا ثبات و يتعب البشرة !
ما أنصح فيه أبدا أبدا حلو يمكن للبنات الي بالمدرسة ( أحساس )
استخدم نقطة بسيطة منه قبل الفنديشن عشان يرطب البشرة (فقط)..
السابع هو ( CLARINS Skin Illusion ) :
كليرنس كا براند معروفة أنها طبيعية جدا و البردكت حقتها كلها تساعد البشرة .
الفنديشن حلو إذا عندك حبوب أو مشاكل في بشرتك لأنه غير التغطية الجميلة برضو يعالج البشرة .
حلوه تغطيته مره بس ينشف بسرعة على البشرة يعني لازم قبله كريم ترطيب !
أصنفه مع شانيل و بيبي براون بالأستخدام اليومي .
وبكذا خلصنا
وقبل كل شي لازم تعرفون أن كل وحده بشرتي غير الثانية مو لازم يناسبك الي يبناسني !
و كل مره أعيد و أزيد حبايبي أشربوا مويه ما تتوقعون قد أيش ممكن تغير فيكم
بالنسبة لي أذا قعدت فترة أشرب موية ( ٤ ل ٦ شهور ) بشرتي تتغير مره لدرجة أني أضطر أني أغير الفنديشن ! البثور و الحبوب و التبقع يبدأ يختفي بشكل ملحوظ .... ما أنصحكم تشربون مويه ألا أقولكم لازم لازم تشربون مويه 3>
وشكرا حبايبي
عندكم أي سؤال أو استفسار أو موضوع حابين أتكلم لكم عنه هذا أيميلي :
CozmoBurqa@gmail.com
0 comments