بسم الله الرحمن الرحيم
انشالله أن الكل بخير و مستعدين للأجازة الجميلة القصيرة
و بصراحة الأيام تمشي بسرعة كأنه أمس كاتبة مفضلة الشهر الي فات !
لما أقول مفضلة يعني أشياء استخدمتها كثير بهذا الشهر يمكن يكون أي شي !
و نقول بسم الله نبدأ :
الأسوارة الجميلة من حبيبتي رشا Tidbits
حبيتها مره (صايرة أالبسها كثير ) حبيتها مع العباية أكثر شي تغير عن المعتاد .
بسيطة و أنيقة بنفس الوقت ، تدخل مع المجوهرات بطريقة حلوه ، تميمها جدا كلاس و أنيق يناسب الكل و بكل المناسبات .
عندها أشكال كثيرة بعد حلوه !
ناوية أخذ لي كم وحده تغير على الي عندي لان أعرف نفسي إذا دخل بمزاجي الشي مراح أخليه الا بواحد غيره :)
هذا حسابها بالأنستغرام
النظارة الشمسية من Versace
على ان شكلها متكلف بس بنفس الوقت عملي !
قصتها تناسب أغلب رسمات الوجه و تفاصيلها زي ما أنتوا شايفين جدا جميلة وطبعا أحلى شي فيها لونها الأسود ( ملك الألوان)
أخذتها من محل البدر للنظارات
السليبر من PRADA
مريح مريح أنا ما ألبس سلبير كثير بس ما أعرف ليه أحبهم بدبي مريحة و بنفس الوقت حلو شكلها بالعباية
و أحبها بعد بطلعات البحر تجنن !
أخذت لونه أسود عشان يناسب أغلب الملابس الي عندي
طلعوا منها بعد أشكال حلوه و جلود حلوه بعد مريحه بالمشي شي ما تتخيلونه ..
الشنطة الجميلة Dior Seimo
يا رب ما أعرف وش أقول !
كانت ب wish List حقتي من زمان ، كنت أبيها أولا عشان موديلها جميل جدا كلاسك و أنيق لأبعد الحدود و عملية أكثر من lady Dior بمليون مره و نوعية الجلد الي مستخدمينها جدا عملي و يتحمل كثير .
و مشالله تشيل كل شي (فنانة بالسفر )
ألوانها جميلة ( هذا اللون أنا مره أحبه ) مو كل أحد يتقبل يشيل شنطة فوشي بس هذا لونها وردي قاني يعني بارد !
و عشان الصيف جا ربطت الشال عليها ( أحب مره الشال الملون مع الشنطة السادة تعطي شكل أنيق و ملفت و صيفي )
نزلوا منها مني سايز ( حجم صغير ) بس ما عجبتني حسيتها صغيره بزيادة !
وبس و أنا مره أحبها فا لو تفكرين تشترين شنطة ستايل و عملية و ما تقدم بنفس الوقت أنصح فيها و بقوة ..
دايم تسحرني التفاصيل !
2022 Generation
by Stéphane Humbert Lucas 777
من عطوري الجميلة (أحب الشخص الي أهداني العطر ) ريحته جداً جميلة ثقيلة و شرقية بشكل قوي تمثل روائح عطورنا الشرقية أطلق المصمم العطر 2022 بمناسبة حصول قطر على استضافة كأس العالم
ريحته مميزة و تنحفظ بسرعة و ثباته جداً عالي من العطور الشرقية المميزة عندي كل ما أشمه بأحد أقول هذا العطر القطري
مكوناته : أول ما تحطيه تشمين ريحة حارة و قوية (زهرة البرتقال واللوز) و لما يبرد شوي (شاي أخضر و ورد ) و لما يبرد نهائي و يثبت ( ياسمين و فول التونكا و خشب الصندل ) حبي الجديد خشب الصندل
صرت فنانة هل المره و دورت وين مكان بالسعودية تلقونه في باريس قاليري .
شمعة Diptyque Hiver
قررت أنشالله كل شهر أشتري شمعة جديدة و أجربها :)
فا شمعة هذا الشهر هي Hiver من أقوى الشموع الي عندي بالفترة الأخيرة
ريحتها على أنها صغيرة بس قوية أخذتها من أخر سفرة لي بدبي
مره حبيتها كان ودي منها حجم كبير عشان تطول عندي :)
طبعا ديبتك مميز جدا بشموعه خاص اللميتد أدشن و هذي منهم (نزلها بمناسبة السنة الجديدة 2015 ) ريحتها على عود وخشب صندل و فيها شوي برغموت
جدا رايقة و على ان الريحة قوية بس هادية بنفس الوقت .
نبدأ اللحين بالبيوتي :
الفرش من Make Up For Ever
من أجمل الفرش الي أشتريتها بالفترة الأخيرة
أنا قررت قرار جديد اني استخدم فرش أقل فما أشتري الا الي أحتاجه صدق ! و الفرش الي تشفونها من أجمل و أفضل و مستحيل أعيش بدونهم و كا جودة مره معروفة مشالله و خلتني أستغني عن كثير من الي الفرش الي عندي و طبعا كلها شعر طبيعي فا سعرها يصير مرتفع عن العادي .
من اليمين لليسار
اليمين تستخدم للوس باودر ( الباودرة المنثورة أو العادية ) جميلة تشيل بودرة و بنفس الوقت ما تبقى شي فيها اذا استخدمتيها (نظيفة ) و ناااعمة .
اليسار مشط للحواجب مره مفيد أول ما تبدأين بحواجبك لازم تمشطينها قبل عشان تصير مرتبة و بعد ما تحطين (الشدو او الجل للحواجب ) مشطيها بأخير عشان يعطيك شكل طبيعي .
من اليمين لليسار
اليمين فرشة كنتور جميلة جميلة جميلة من أفضل ما استخدمت للكنتور أولا ما تكب البرونز على الطول ثانيا جميلة بالتوزيع (فنانة) حبيتها مره على البشرة ناعمة مره و تشوفون انها مشطوفة مره مريحة و ما يبغالك فن و انتي تستخدميتها.
اليسار بعد خاصة بالحواجب جربتها مع بودرة الجواجب و مع الجل كلهم طلعوا جميلين مع الفرشة مسكتها مريحة و الفرشة الشعر فيها قاسي شوي و هذا الشي يريحك و انتي ترسمين حواجبك .
و استخدمها بعد للجل لاينر على العيون مره ممتازة .
الحب لونا LUNA
كاتبة بوست بالتفصيل الممل عنها
هذا البوست LUNA mini By POREO
صراحة صايرة ما أستغني عنه أبد و خاصة اذا بغسل وجهي بعد المايك اب
مريح مرره :) ويعطي لمعة جميلة بعد الأستخدام المتكرر .
المانكير من TOM FORD
درجة 06
Indian Pink
اللون يقول أهلا بالصيف حبيته مره مع التان و أحلى ما فيه طبقة واحده تكفي و درجة لونه تناسب أغلب الوان البشرات .
كريم اليد من Diptyqe
Eau Rose Hand Emulsion
هذا ثلاث واحد أشتريه جربت كريمات كثيرة و ترطب أكثر من هذا بس هذا الجميل ريحته جميلة تمسك باليد و ترطيب لطيف
ريحته ورد منعش أحبها مره بالمناسبات .
أحيانا أحطه على منطقة الرقبة و بعدها أبخ العطر يثبت العطر بدرجة ما تتصورون .
و بكذا خلصت بوست مفضلتي للشهر فبراير ! أعرف مفروض تكون بداية مارس بس الوقت لآسف ما سمح لي و انشالله استفدتوا من البوست
و أحبكم أنا ....
0 comments